اسلام آباد(نیٹ نیوز) حکومت کی جانب سے کچھ ادویات پر 18 فیصد تک جنرل سیل ٹیکس لگانے کی وجہ سے ان کی قیمتوں میں ہوشربا اضافہ ہوگیا ہے۔لاہور میں میڈیکل سٹور مالکان نے بتایا حکومت نے جلد اور طاقت کی ادویات، ملٹی وٹامنز، کیلشیم، ملک پاوڈر، شوگر سٹرپس اور ہربل ادویات پر 18 فیصد جنرل سیلزٹیکس لگا دیا۔ میڈیکل سٹور مالکان کے مطابق حکومتی اقدام کی وجہ سے شوگر جیسے امراض میں مبتلا، بوڑھے اور کمزور افراد اور بچے زیادہ متاثر ہوئے ہیں، پہلے یہ لوگ ہفتوں کی دوا لے جاتے تھے، اب صرف ایک 2 دن کی ادویات خریدنے آتے ہیں۔ ڈرگ پاکستان لائرز فورم کے صدر نور مہر کا کہنا ہے ہربل، ہومیو پیتھی، وٹامنز اور فوڈ سپلیمنٹس پر 18 فیصد جی ایس ٹی ظلم ہے، ڈرگ ایکٹ کے تحت ان ادویات پر ٹیکس نہیں لگ سکتا۔ مریضوں اور ان کے لواحقین نے مطالبہ  کیا ہے حکومت اپنے فیصلے پر نظرثانی کرے۔