لاہور، کراچی، اسلام آباد سمیت کئی شہروں میں حماس رہنما یحییٰ السنوار کی غائبانہ نماز جنازہ
کراچی/ لاہور (نوائے وقت رپورٹ) پاکستان کے مختلف شہروں میں حماس کے شہید سربراہ یحییٰ السنوار کی غائبانہ نماز جنازہ ادا کی گئی۔ امیر جماعت اسلامی حافظ نعیم الرحمن کی اپیل پر کراچی میں نیو ایم اے جناح روڈ پر یحییٰ السنوار کی غائبانہ نماز جنازہ ادا کی گئی جس میں شہریوں کی بڑی تعداد نے شرکت کی۔ لاہور اور کراچی پریس کلب کے باہر غائبانہ نماز جنازہ کے اجتماعات میں سیکڑوں شہریوں نے شرکت کی۔ اسلام آباد میں نیشنل پریس کلب کے سامنے غائبانہ نماز جنازہ میں مذہبی و سیاسی شخصیات سمیت سول سوسائٹی کے افراد کی کثیر تعداد شریک ہوئی۔ شرکاء نے اسرائیل کے خلاف اور فلسطین کی حمایت میں پرجوش نعرے بھی لگائے۔
