سندر +سرگودھا(نامہ نگار+نمائندہ خصوصی) رائیونڈ تبلیغی جماعت کے اجتماع کے آخری روز دعا کے بعد مندوبین سے بھری بس رائیونڈ اجتماع چوک کے قریب روہی نالہ میں گرنے سے بس میں موجود 29 افراد زخمی ہوگئے۔ ریسکیو 1122 نے 13 افراد کو موقع پر طبعی امداد جبکہ 16 افراد کو ہسپتال منتقل کر دیا۔ روہی نالہ کے دونوں اطراف جہاں حفاظتی باڑ موجود نہ تھیں وہیں ٹریفک کے بہاؤ کو کنٹرول کرنے کے لئے ٹریفک پولیس کے خاطر خواہ انتظامات نہ تھے۔ روہی نالہ پر موجود بیشتر پل کے اطراف بھی حفاظتی دیواریں موجود نہیں۔سرگودھا سے نمائندہ خصوصی کے مطابق رائیونڈ تبلیغی اجتماع سے واپس آنے والی گاڑی الٹ جانے سے دو افراد جانبحق اور سات شدید زخمی ہو گے جن کو ہسپتال منتقل کر دیا گیا۔ذرائع کے مطابق رائیونڈ تبلیغی اجتماع سے واپس آ کر دیر بالا جانے والی گاڑی قومی شاہراہ  موٹر وے ایم ٹو پر سرگودھا کے علاقہ بھیرہ انٹرچینج کے قریب ٹائر برسٹ ہو جانے سے الٹ گئی جس کے نتیجہ میں دو افراد 33 سالہ نیک محمد، 53 سالہ صابر شاہ جانبحق اور سات افراد 44 سالہ محمد اشرف،44 سالہ گل سلیم،40 سالہ  ہدایت اللہ،56 سالہ عبدالوہاب،19 سالہعبدالواحد،42 سالہ نور شاہ اور 20 سالہ عظیم خان شدید زخمی ہو گے جن کو ٹی ایچ کیو ہسپتال منتقل کر دیا گیا جہاں تین مذید کی حالت نازک بتلائی جا رہی ہے۔