اسلام آباد (نوائے وقت رپورٹ) وزیر دفاع خواجہ آصف نے کہا ہے کہ بعض افراد کہتے ہیں امریکا سے کال کی دیر ہے اور بانی پی ٹی آئی کو حوالے کر دیا جائے گا۔ بعض افراد کہتے ہیں پاکستان کال پر انکار کی جرات نہیں کر سکتا۔ اپنے بیان میں خواجہ آصف نے کہا کہ نہایت ادب کے ساتھ عرض ہے نواز شریف کو کال کے ساتھ پانچ ارب ڈالر کی آفر بھی تھی۔ نواز شریف نے انکار کیا اور ایٹمی دھماکہ بھی کیا۔ پرویز مشرف کو کال آئی، وہ لیٹ گیا۔ جو حکم ملا اس سے زیادہ پر راضی ہوئے۔ خواجہ آصف نے کہا کہ نائن الیون والی جنگ ہو چکی۔ افغانستان میں امن ہے۔ پاکستان  آج  بھی اس کے نتائج دہشتگردی کی شکل میں بھگت رہا ہے۔ انہوں نے کہا کہ یہ بیانات دینے والے نواز شریف نے انکار کیا تو اس کے ساتھ  تھے۔ مشرف نے ہتھیار ڈالے تو اس کے ساتھ تھے۔ آپ ہی اپنی اداؤں پہ ذرا غور کریں۔ ہم اگر عرض کریں گے تو شکایت ہو گی۔